Sagan
_edited.jpg)
1. Stofnun og fyrstu ár (1998-1999)
RST Net var stofnað 8. janúar 1998 af Þórarni Kristjáni Ólafssyni raforkuverkfræðingi og Arnhildi Ásdísi Kolbeins viðskiptafræðingi. Markmiðið frá upphafi var að veita sérhæfða þjónustu í raforkuiðnaði og bjóða varahlutaþjónustu og ráðgjöf fyrir orkufyrirtæki. Fyrstu verkefnin voru aðallega viðhald og viðgerðir á raforkubúnaði fyrir Rarik, m.a. á dreifi- og aflspennum og tengivirkjum.
2. Fyrstu framkvæmdaverkin (1999-2002)
Fljótlega tók fyrirtækið að sér stærri verkefni. Þar má nefna uppsetningu raforkubúnaðar fyrir Sultartangavirkjun árið 1999 og vél- og rafbúnaðar fyrir Vatnsfellsvirkjun 2000–2002. Þar urðu þáttaskil í starfseminni: Vélfræðingar, vélvirkjar og málmiðnaðarmenn bættust í hópinn og fyrirtækið varð jafnhæft á sviði vél- og rafiðnaðar.
Vatnsfellsvirkjun: RST Net sá um uppsetningu á innsteyptum og samsettum hlutum, túrbínu, aflvél, 220 kV gaseinangruðu tengivirki, 11 kV strengjum, 2 x 11/220 kV 50 MVA aflspennum, 11/0,4 kV stöðvaspennum, rafalatengibúnaði, IBP og aflrofum ásamt öllum hjálpar- og stjórnkerfum fyrir virkjunina.
.jpg)
3. Nýir markaðir og stækkun
(2003–2011)
Eftir Vatnsfellsvirkjun hófst öflug uppbygging og verkefni fyrirtækisins færðust í auknum mæli yfir í verktöku í stærri framkvæmdum. Verkefnin urðu fjölbreyttari og samstarf við stóra viðskiptavini jókst, sérstaklega álverin þrjú sem urðu fastir viðskiptavinir á öllum sviðum fyrirtækisins. Á þessu tímabili byggði RST Net nýjar höfuðstöðvar að Álfhellu 6 í Hafnarfirði og hófst þar markviss uppbygging á aðstöðu og búnaði fyrir spennaviðhald, framleiðslu og frekari framkvæmdir.
Efri mynd: RST Net sá um uppsetningu á rafbúnaði fyrir 6. áfanga í jarðvarmavirkjun á Nesjavöllum,
þ.m.t. lagningu og tengingar á stjórn- og háspennustrengjum.
Neðri mynd: RST Net vann töluvert fyrir ALCOA Fjarðaál 2009 og 2010. Árið 2009 sá fyrirtækið um útskipti á 120 stk 52 kV útiendabúnaði við fimm afriðladeildir hjá álveri ALCOA í Reyðarfirði. Árið 2010 sáu starfsmenn fyrirtækisins um að aftengja og fjarlægja afriðil og afriðla- og reglunarspenna sem skemmdust í bruna 18.12.2010. Einnig sá fyrirtækið um uppsetningu á nýjum háspennu-, lágspennu- og stýristrengjum ásamt uppsetningu og prófunum á afriðlabúnaði.
4. Framleiðsla dreifispennistöðva (2012-2014)
Árið 2012 hóf RST Net hönnun og undirbúning að framleiðslu dreifispennistöðva (50–315 kVA). Fyrstu eintökin voru seld í árslok 2014 og markaði það nýjan kafla í sögu fyrirtækisins þar sem eigin framleiðsla bættist við þjónustu og uppsetningu.
Hér má sjá Hilmar Thorarensen Pétursson vélvirkja og verkstjóra, með þúsundustu VERTO dreifispennistöðina sem RST Net framleiddi.
5. Tengivirki og varmadælustöð í brennidepli (2015–2019)
Á þessu tímabili vann RST Net að fjölda stórframkvæmda sem styrktu stöðu fyrirtækisins á markaðnum. Þar má nefna uppsetningu nokkurra tengivirkja (AIS) í Mjólká, á Hvolsvelli og Akranesi, auk Varmadælustöðvar í Vestmannaeyjum. Á vormánuðum 2017 gekk fyrirtækið frá fjögurra ára samningi við Rarik ohf að undangengnu útboði um framleiðslu á öllum dreifispennistöðvum fyrir þá af stærðinni 50 kVA, 100 kVA og 200 kVA.
Þessi verkefni voru umfangsmikil og krefjandi og sýndu fram á getu fyrirtækisins til að taka að sér stór og flókin verk á sviði innviðauppbyggingar.
Efri mynd: Varmadælustöðin í Vestmanneyjum. Árið 2018 sá RST Net um öflun og uppsetningu á rabúnaði fyrir varmadælustöðina í Vestmanneyjum ásamt tengingu á varmadælubúnaði. Varmadælustöðin er 10,4 MW og er gert ráð fyrir að hún anni um 80% af orkuþörf hitaveitunnar. Í varmadælustöðinni eru sjódælur sem dæla 6-700 lítrum af 6-11°C heitum sjó í gegnum eimi og kæla hann niður. Orkan sem fæst með kælingunni flyst yfir í seinni varmaskipti sem hitar upp hitaveituvatnið.
Neðri mynd: Árið 2016 vann Rst Net að tengivirki í Mjólká. Verkefnið fólst í uppsetningu á 132 kV og 66 kV rofabúnaði (AIS), smíði og uppsetningu stjórn- og varnarbúnaðar auk útvegunar á strengjum og öðru raflagnarefni vegna uppsetningar á spenni 4.
6. Stafræn tengivirki, orkuskipti og gæðakerfi (2019–2024)
Þessi tími markaði þáttaskil í starfsemi RST Net með uppsetningu fyrsta stafræna tengivirkis (GIS) fyrir Landsnet sem fyrirtækið kom að. Í samstarfi við svissnesku verkfræðistofuna KEK, sem sérhæfir sig í stjórn- og varnarbúnaði stafrænna tengivirkja, urðum við fljótlega leiðandi sérfræðingar á þessu sviði á Íslandi. Við sjáum nú um forritun búnaðarins og höfum prófunarbúnað á höfuðstöðvunum.
Á sama tíma jókst fjöldi stafrænna tengivirkja, og RST Net hóf vinnu við orkuskipti m.a. með sölu hleðslustöðva til Landsvirkjunar og fleiri aðila. Þjónustudeild fyrirtækisins óx einnig og sinnir í dag spennaviðhaldi og almennri þjónustu á raforkukerfum fyrir álver, stóriðjur og raforkukerfi um land allt.
Í þessum áfanga hófst markviss vinna að gæðakerfi fyrirtækisins og fyrstu vottanirnar litu dagsins ljós: ISO 9001:2015 fyrir gæðastjórnunarkerfi og jafnlaunavottun ÍST:2012.
Nýr kafli – nýtt útlit og stórframkvæmdir (2024– )
Árið 2024 hófst nýr kafli í sögu RST Nets þegar fyrirtækið kynnti uppfært merki og ferskt útlit sem endurspeglar skýra skírskotun til raforkugeirans. Árið 2025 hlaut fyrirtækið umhverfisvottunina ISO 14001 sem staðfestir markvissa vinnu að sjálfbærni og ábyrgri umhverfisstefnu, ásamt því að vinna að vottun öryggisstjórnunarkerfis sem er áætluð haustið 2025.
RST Net heldur áfram að taka þátt í stórum innviðaverkefnum á Íslandi. Þar má nefna Vaðölduver fyrir Landsvirkjun þar sem setja á upp fyrsta vindmyllugarðinn á Íslandi. Þar sér fyrirtækið um útvegun og uppsetningu á 33 kV og 11 kV dreifingu ásamt stöðvarnotkunarspennum. Einnig felur verkið í sér 400 V aðaldreifingu, tvær jafnstraumsdreifingar, stjórn- og varnarbúnað með forritun og uppsetningu, auk eftirlits og frágangs á 33 kV og 11 kV strengjum og 220 kV gegnumtök ásamt ýmnsum viðbótarverkum.
Á sama tíma vinnur fyrirtækið að nokkrum stórum verkefnum fyrir Landsnet. Þar má nefna stafrænt tengivirki við Ferjufit sem tengt verður fyrsta vindmyllugarði landsins, auk verkefna í Sigöldu og á Klafastöðum.
Til vinstri: Hið nýja tengivirki á Klafastöðum verður 220 kV tengivirki með 7 rofareitum. Þá verður núverandi 220 kV þéttavirki á Brennimel flutt til Klafastaða og inn í rofasal núverandi launaflsvirkis.
Til hægri, efri mynd: RST Net og Landsvirkjun undirrita samning vegna útvegunar og uppsetningu á búnaði fyrir Vaðölduver.
Til hægri, neðri mynd: Nýtt lógo RST Nets.